Вершы беларускіх паэтаў

Нацыянальны паэтычны партал

Уваход

Апошнія водгукі

Раiм наведаць


Каб дадаць спасылку
на Ваш сайт, пiшыце ў
зваротную сувязь

Лічыльнікі

Ці, можа, здалося...

Сярэдняя: 3.7 (3 галасоў)

Ці, можа, здалося,
Што зваў мяне хтосьці?
Агледзеўся:
Восень
Старая –
У госці.

Здалёку вітае,
Махае, ківае
I слёз не хавае
Вяшчунка сівая.

Хоць восень старая,
Душой не глухая:
Мяне дакарае,
Глыбока ўздыхае,

Што ўжо на радзіме
Я быў даўнавата,
Што мама і хата
Глядзяць вінавата,

Чакаюць:
Павінны
Шляхі-пуцявіны
Прывесці мяне
Да сваёй пупавіны.

Журбой спавівае,
Ціхутка спявае,
Мне восень
З маленства
Ўспамін навявае.

Нібы немаўля я,
Мяне замаўляе,
Ах, восень-шаптуха, –
Мая павітуха!

Мая дарагая,
Хоць позняя госця.
...Няўжо мне здалося,
Што зваў мяне хтосьці?