паэт прачынаецца а 11.20
правіць пару радкоў
ва ўчорашнім вершы пра красу сьвету
выпівае гарбаты выпальвае дзьве цыгарэты
пасля чытае Кляўса Мана ў сарціры
а 12.40 выбіраецца ў краму
але ў парку засраным лабрадорамі і пэкінэсамі
сустракае некалькі сукіных сыноў
як звычайна просяць нечага
атрымаліваюць па зубох
паэт таксама зарабляе па яйках
вярнуўшыся ў пакой
з хлебам макаронамі і пабітымі яйкамі
перакрэсьлівае пару радкоў
ва ўчорашнім вершы
–
дзень выдаўся надзвычай паэтычны
увечары трэба будзе пачаць новы верш
пра гэтую клятую красу сьвету