Вершы беларускіх паэтаў

Нацыянальны паэтычны партал

Уваход

Раiм наведаць


Каб дадаць спасылку
на Ваш сайт, пiшыце ў
зваротную сувязь

Лічыльнікі

Рамонкавы хлопчык...

Сярэдняя: 4 (2 галасоў)
Рамонкавы хлопчык,
                                    у джунглявых травах па плечы,
Ты пырхаеш зранку
                                   у красках накшталт матыля.
Спагадны да ўсіх,
                               ты яшчэ не баішся сінечы
I сочыш з увагай
                               за сытым гудзеннем чмяля:

Напіўшыся мёду,
                               глядзіш, як сярдзітыя восы
Пікіруюць дружна
                               на душны прыземлены сад.
Як джаляць пякуча яны!
                                          А ёсць бамбавозы,
Што рокатам чорным
                                     бацькоўскі хіснуць палісад.
 
Даверлівы хлопчык,
                                   ты  ціхім  заходзішся плачам,
Размажаш па шчоках
                                      пацёкі слязы, як смалы.
А ёсць яшчэ гора,
                               што бліскае джалам гарачым —
Гарластых гармат,
                               а не сосен нагрэтых ствалы.

I  краскі счарнеюць,
                                   ты чуеш планеты дрыжанне.
У свеце разгойданым —
                                            тупат шалёны каня.
Праз попелу дым
                               і каня нелюдское іржанне,
Праз спалены луг
                               бяжыць столькі год хлапчаня.

Бяжыць ён у сне,
                               схаладнелы ад ліпкага поту,
Да цёмных крыніц,
                                 што крывёю братэрскай кіпяць.
Кашуля — як ветразь.
                                      Хто меў нелюдскую ахвоту
Яе бессардэчна
                           і гэтак навечна напяць?

А недзе пад ветрам
                                  гайдацца выносістым пальмам,
Сланам шукаць засень,
                                        дзе дыхаць у спёку лягчэй.
А можа, і там
                        пад бязлітасна грозным напалмам
У попел рассыплюцца
                                       яблыкі спелых вачэй?