Ларысе Геніюш
Уваскрасаюць: постацяў абрысы
расхліствае спалохана туман.
Рагнеда, Еўфрасіння і Ларыса,
ад Краю адвядзеце чорны зман!
Уваскрасаюць. I Сусвет раскрыўся,
і верай прасвятлеў Птушыны IIIлях.
Рагнеда, Еўфрасіння і Ларыса —
у трыадзінстве Сонца, Бог, Зямля.
Уваскрасаюць! Над апошняй рысай,
што Бацькаўшчыну хціва расцяла,
Рагнеда, Еўфрасіння і Ларыса —
праменне радаводнага святла.
Уваскрасаюць! Памажы ім, Хрысце!
Сысці на дол з пакутнага крыжа.
Рагнеда, Еўфрасіння і Ларыса —
надзея жыць і прага нараджаць.