Раса раскашуе, рудзець
Загару маёва.
Выносяцца гукі з грудзей –
Простая мова.
У матчынай хусткі касьнік –
Сусьвету абнова.
Нясхільная звону казны
Простая мова.
Будзіла будынкі бяда
Грымотна, сурова.
Ахоўвала краю будан
Простая мова.
Патрапіў у пекла сатрап,
У жорсткія ловы.
Кавадла – радзіма сярпа.
Простая мова.
Дарэмна ламаў ураган
Вясёлку на дровы.
Зубры са стажком на рагах –
Простая мова.
Зракліся замовы ануч,
Дзе з шэптамі змова.
Зацятыя вусны на ключ –
Простая мова.