З вечара збяруся парыбачыць,
Падрыхтую спінінг і вуду,
У выходны свой з самааддачай
На прыродзе час я правяду.
Ад прыпынку да вады – сцяжынка
Ва ўзбярэжны, выгнуты хмызняк.
Тут на воблер з хвосцікам – пушынкай
Можа возьме жэрах ці шчупак.
Адлятае з ветрыкам самота,
Сапсаваць няможна добры клёў.
Ля ўзбярэжжа ў гушчары чарота
Чуйна стала зграйка карасёў.
А па плыткаводдзю ходзяць плоткі,
Пад навіслым дрэвам – акуні.
Хлопцы ловяць краснапёрак з лодкі.
Шчасце, ты мяне не абміні!
З глыбіні аблокі выплываюць,
Лебедзі закруцяць карагод.
Свежага паветра выпіваю,
Як і ўвесь рыбацкі наш народ.
І, зачараваны наваколлем,
Выйду на пясчаную касу.
Рыбы не злаўлю, так для застолля
Нізку новых вершаў прынясу.